Van ’t Schip: – Eitt stig úr Føroyum er ein góð byrjan

Nýggi landsliðsvenjarin hjá Kasakstan, John van ’t Schip, var rímiliga væl nøgdur við at fáa eitt stig við sær úr Føroyum eftir 1-1 javnleikin á Tórsvølli leygarkvøldið.

Hetta var fyrsti dysturin hjá niðurlendska venjaranum sum landsliðsvenjari hjá Kasakstan. Føroyar komu á odda eftir 14 minuttir við máli frá Áka Samuelsen, men Temirlan Yerlanov javnaði 12 minuttir seinni eftir upplegg frá Bauyrzhan Islamkhan í hornasparksstøðu.

Eftir dystin segði van ’t Schip, at við gongdini í dystinum kundi Kasakstan liva við javnleikinum.

– Tá vit hugsa um, at vit komu afturum longu eftir 15 minuttir, haldi eg, at vit kunnu góðtaka úrslitið. Vit javnaðu og høvdu síðani meira bólt, meðan mótstøðuliðið var vandamikið í skjótum, beinleiðis álopum, segði van ’t Schip sambært KazFootball.

Kasakstan hevði eisini ein stóran møguleika at koma á odda, tá Yan Vorogovskiy rakti stongina. Hinvegin hevði føroyska liðið eisini møguleikar í seinna hálvleiki.

Van ’t Schip var serliga nøgdur við verjuspælið og helt, at Kasakstan megnaði at standa saman sum lið.

– Vit hildu konsentratiónina allan dystin og megnaðu at verja sum ein eind. At fáa eitt stig við sær hiðani er ein góð byrjan hjá okkum, segði hann.

Venjarin segði tó eisini, at offensivi parturin ikki riggaði nóg væl. Sambært Sports.kz helt hann, at Kasakstan eftir útjavnandi málið hevði meira tamarhald á dystinum, men at álopsspælararnir ikki fingu víst tað spælið, sum teir eru førir fyri.

Fyri Kasakstan var dysturin samstundis merktur av, at fleiri týðandi offensivir spælarar manglaðu. Van ’t Schip hevði longu undan dystinum víst á fráverurnar hjá millum øðrum Dastan Satpayev, Maksim Samorodov og Islam Chesnokov.